January 28, 2022

pavoor.in

Leading conservative magazine covering news, politics, current events, and culture with in-depth analysis and commentary

திருச்சி விவசாயிகளை கண்ணீரில் மூழ்கடித்த மழை!

திருச்சி விவசாயிகளை கண்ணீரில் மூழ்கடித்த மழை!

திருச்சி

திருச்சி மாவட்டம், முசிறி அருகே அறுவடைக்கு தயாராக இருந்த சுமார் 1,500 ஏக்கருக்கு மேற்பட்ட பரப்பிலான நெற்பயிர்கள் தண்ணீரில் மூழ்கி சேதமானதால் விவசாயிகள் வேதனை அடைந்துள்ளனர். நெல் தானியத்தை சாகுபடி செய்து அதனை விற்று லாபம் ஈட்டும் சூழல் மாறி தங்களது உணவிற்கே கடைகளில் அரிசி வாங்கும் நிலை ஏற்பட்டுள்ளதாக அவர்கள் கண்ணீருடன் தெரிவித்துள்ளனர்.

முசிறி அருகே உள்ள கொடுந்துறை, கோட்டூர், ஆமூர், உமையாள்புரம், செவந்தலிங்கபுரம், அய்யம்பாளையம் உள்ளிட்ட பல்வேறு கிராம பகுதிகளில் காவிரியாற்றின் பாசன வாய்க்கால்கள் மூலம் பயன்பெறும் விவசாய நிலங்கள் நிறைந்துள்ளன. முசிறி காவிரி டெல்டாவில் கடந்த ஆகஸ்ட் மாதம் நாற்று விடப்பட்டு சம்பா நெல் சாகுபடி செய்யப்பட்டது.

தற்போது நெற்பயிர் கதிர் முற்றி அறுவடைக்கு தயார் நிலையில் காணப்படுகிறது. இன்னும் சில தினங்களில் விவசாயிகள் அறுவடை செய்ய இருந்த சூழலில் கடந்த 15 தினங்களாக தொடர் மழை பெய்து வருகிறது.

இதன் காரணமாக நெற்பயிர் சாகுபடி செய்துள்ள வயல்களில் தண்ணீர் தேங்கி நிற்கிறது. இதனால் தலை சாய்த்து கிடக்கும் நெற்கதிர்கள் முளைவிட்டு வளரத் தொடங்கியுள்ளன. இதனால் விவசாயிகள் நெற்கதிர்களை அறுவடை செய்ய முடியாமல் மிகுந்த சோகத்தில் மூழ்கியுள்ளனர்.

இதுகுறித்து இப்பகுதி விவசாயிகள் கூறியதாவது:

ஏக்கர் ஒன்றுக்கு சுமார் 30 ஆயிரம் ரூபாய் செலவு செய்து நெல் சாகுபடி செய்த நிலையில் தற்போது நெற்பயிர் அறுவடைக்கு தயார் நிலையில் இருந்தது. ஆனால், கடந்த 15 தினங்களாக பெய்த தொடர் மழை காரணமாக நெல் வயலில் தண்ணீர் தேங்கி நிற்கிறது.

கதிர் முற்றி தலை சாய்ந்து கிடக்கும் நெற்கதிர்களிலிருந்து பயிர் முளைவிடத் தொடங்கிவிட்டது. தண்ணீரில் மூழ்கி கிடக்கும் நெற்பயிரும் அழுக தொடங்கியுள்ளது. இதனால் நெல் சாகுபடி செய்துள்ள விவசாயிகளுக்கு பெரும் இழப்பு ஏற்பட்டுள்ளது.

மேலும், சில விவசாயிகள் நெற்பயிர் காப்பீடு செய்துள்ளனர். ஒரு சில விவசாயிகள் காப்பீடு செய்யாமலும் இருக்கின்றனர். குறிப்பாக கொடும் துறை கிராமத்தில் 612 ஏக்கர் பரப்பளவிலும், கோட்டூர், ஏவூர், ஆமூர் கிராமங்களில் சுமார் 300 ஏக்கர் பரப்பளவிலும், உமையாள்புரம், செவந்லிங்கபுரம், அய்யம்பாளையம் உள்ளிட்ட கிராம பகுதிகளில் சுமார் 350 ஏக்கர் அளவிலான நெற்பயிர்கள் பெருத்த சேதம் அடைந்துள்ளன.

எனவே, தமிழக அரசு நெற்பயிர் சேதமடைந்துள்ள விவசாயிகளின் நிலங்கள் குறித்து வருவாய்த் துறை அலுவலர்கள் மூலம் உரிய கணக்கெடுத்து அதற்கான இழப்பீட்டுத் தொகையை உடனடியாக வழங்க வேண்டும்.

சாகுபடி செய்துள்ள நெல் தானியத்தை விற்பனை செய்து லாபம் ஈட்டும் சூழல் மாறி எங்களது உணவிற்கே கடைகளில் அரிசி வாங்கும் நிலை ஏற்பட்டுள்ளது. எனவே தமிழக அரசு விவசாயிகளுக்கு உரிய இழப்பீட்டை உடனடியாக அறிவித்து வழங்க வேண்டும்.

இவ்வாறு விவசாயிகள் கண்ணீர் மல்க தெரிவித்துள்ளனர்.

error: Content is protected !!
Open chat